ꆀꃅꈎꏅ
ꁱ:ꆈꀜꀈꏦ
ꀘ:ꇍꇖꀉꇤ
ꆿꆪꏮꁦꏁꄮꆏ,
ꎰꆳꉻꄹꁏ,ꌩꏾꇗꄹꊰ
ꉈꐎꑌꊖꆈꌋꆀꊰꇁꌠꌩꏾꋌꒃꐯꇯ
ꑓꏮꆃꎭꃅꄷꉜꇬ
ꁧꄩꐛꑊꆹꇯꍝꃅꎔꃨ
ꀒꎂꇓꈓꆹꊾꈬꆈꄅꀕꇬꎷꑴꌦ
ꄚꇬꆹꈎꏅꌠꌌꉪꀋꄐ
ꈍꄮꈋꄮꉬꀋ
ꉢꌧꇐꂿꇐꊂꈹꄉ,ꈜꎴꎳꏢꇁ
ꃅꈋꐞꁧꊂ
ꉠꎺꏣꈐꏭꁡꇤꆹꃅꎸ、ꃅꋆꀉꄂꇫꊰꇈꃲ
ꉢꉪꉢꏣꇬ,ꀋꃅꋋꄮꆏ
ꀈꉙꆈꒉꐝꍠꀕꏭꐛꀐ
ꃪꆽꉘꁌꃰꐎꎍꏭꐛꀐ
ꀉꄶꁧꐙꃅꈋꁡꇤꀊꋨꍈ
ꈎꊭꈎꄐꐺꏭꐛꀐ
ꎼꈎꆀꃅꈎꏅꆹ,ꉡꆹꀁꇬꁧꂯꄉ
ꋬꂻꅇꄜꀎꋏꀿꃀꁧꇰꁧꂯ
ꀉꄉꀉꂿꇇꀨꁧꂿꉂ
ꐋꀨꀉꆹꋍꑍꏓꈩꁧꂿꉂ
ꆀꃅꈎꏅꑟꇁꀐ,
ꃀꌠꀿꃀꑳꐮꑌꄉꌺꇖꇁꉚꃲ
ꀉꉘꈧꌠꑌ,ꀉꄉꀉꂿꇁꉚꌠꇁꉚ
ꂛꊨꃺꃀꇁꉚꌠꇁꉚ
ꏭꃰꏿꌠꆀꃅꆀꌺꇆ
ꎆꎹꋚꈹꉷꃅꇓꈓꏹꌠꉬꄿꂿ
ꊫꂫꃰꇌꎹꈹꆀꃅꇖꈋꐥꌠꉬꄿꂿ
ꏮꇁꆺꑳꏂꃴꑟꄉ,ꈎꋩꈎꏦꇁ,
ꎆꃀꆿꂷ、ꌧꇐꂿꇐꆹꎹꂿꃅꎴꀕ
ꊿꇬꋬꂻꆏꈎꏅ,ꆀꃅꉂꏣꊼꇅꎹꇁꉏ
ꇤꈏꇢꇑꑭ,ꀉꁌꍜꇰꀉꇐꁮꅉꌧꌠꅲꇁꇆ
ꁦꀑꁧꄩꏭ,ꀊꂵꀉꑳꀉꎓꐥꐨꉙꌠꅲꇁꇆ
2023ꈎ,ꐥꐨꉌꌒꌠꉬꄿꂿ,ꊋꋠꌠꉬꄿꂿ
ꈎꋋꂷꐊꈢꋒꁧꌠ——